Home Minister Pu K. Sapdanga, Prominent Journalist leh MJA ten inkawmhona an nei. Zunzam News web Portal tlangzarh nghal a ni
Editor Lunglei 15/8/2025: Pu K.Sapdanga Home Minister & Prominent Journalist chuan MJA te nen Lunglei Press Club a an in kawm naah thusawiin Journalist role hi khawvelah a hniam thei lo, kan rawngbawlna hi sorkar leh mipui tan entleu ngawt a theih loh. Mipui beisei erawh kan pha kher lo, chanchinbu mi te kan inhlawm khawmna hi min chawinungtu leh min ti hlutu a ni a ti.
Chanchinbu chhuah tawh mang lo ti a miten min sel hian rilru a na thin tih sawiin harsa tak kar a zichhuak kan ni a, ngaihdan hrang hrang kan la khawm a, chu chu a hlu. A nazawngin min sel mahse, kan rawngbawlna hi a hlu a ni a ti.
Sorkar kan hrawn tawh te an fel a, welfare fund te kan nei a, mi fel tam tak fak tur an awm laia ka sawi duh chu Dr.Thangtea a ni a ti. Minister a nih laiin vawi tam MJA in an dawr thin thu leh Official lamin a harsat tur zia an sawi pawhin a kal tlang pui a, A zarah Welfare fund kan nei a, lawmthu ka sawi nawn leh a ni a ti.
Pu Sapa hian Soft copy a chanchinbu chhuah leh hard copy a chhuah hi a hautak dan a in ang reng tho a ni tih sawiin hard copy a la ti hram hram te pawh an fakawm tih thu sawiin paper a sem erawh a ni vak tawh lo a ti. Lehkha phek a in teh hi kan intehna ber a ni tawh lova, thu thar mipui hnen a Opinion va chhawp sak kha Journalist te kan pawimawhna lai ber a ni a ti. Soft copy a ni emaw, TV,Visual,audio engpawhnise mipuiin an chhiar theih kha a hlutna lai ber a ni a ti.
Pu Sapa hian Journalism ah hian a la in chiah reng tih sawiin a pawimawh ber midang te tan a nun hi a pawimawh laitak a ni tih sawiin lungawi hi hausakna ber a ni tih sawiin kan profession ah hian lungawi ang u, lungawina hi a hlu ber a ni a ti. Eizawnna kawng hrang hrangah Journalist te mahni hnaah kan lungawi ber a ni tiin a thusawi a ti tawp a ni.
He hunah hian Prominent Journalist Pu K. Sapdanga, Home Minister ni bawk chuan thusawiin Zunzam Daily News paper in Website an siam https://zunzam.in chu a tlangzarh nghal a ni.Editorial staff te hi Thanghmingliana Renthlei leh VL.Lawma Hnamte te an ni. Website layout design hi Lalremruata Zadeng (Rra Zadeng) Zoen Lunglei in a siam a ni
