Mizoram Lui lian 3 hman tangkai tumm

Lunglei 23/11/25: Union Minister of Ports, Shipping and Waterways Pu Sarbananda Sonowal chuan Mizoramah luidunga inkalpawhna tha a awm theih nan lui lian 3 ah hmalak a ni dawn tih sawiin Khawthlangtuipui leh Tuichawng inkar inkalpawhna ah cheng vbc 9.82 ruahman a nih thu leh lawng chawlhna chi hnih a huam tel dawn a ti.
Kar hmasa zirtawpni-a India Maritime Week 2025 puala hun hmanah Inland Waterways Authority of India (IWAI) leh Assam sawrkar bakah private company ten luidunga inkalpawhna tih hmasawnna tur project atana thawhdunna MoU an ziahna ah he thu hi sawiin Union Minister chuan Mizoram chu hmarchhak bial luidung hmasawnna ah a tel ve tih sawiin hei hian danglamna nasa tak a thlen dawn a ni a ti. Minister chuan Mizoram luidung zingah Tlawng lui leh Chhimtuipui chu zirchian mek a ni tih sawiin hmanraw bun nan Tlawng luiah cheng nuai 89 leh Chhimtuipuiah cheng vaibelchhe 1.42 ruahman a ni a ti a, Lunglei district-a Khawthlangtuipui leh Tuichawng inkar inkalpawhna ah cheng vbc 9.82 ruahman a nih thu leh he project hian lawng chawlhna hmun lian lo chi pahnih a huam tel dawn a ti.
Union Minister hian a deptt chanah Review Meeting neiin hetah hian hmarchhak biala tunhnaia project lian hrang hrang 15 an thawh tur tarlan a ni a, heng zingah hian Mizoram ah project 3 awmin a dang hi hmarchhak state hrang hrangah thawh tur a ni ang.