Editorial

Lungleiah ngei tiin Pu Ngunlianchunga a la au zel

Editor September 1, 2025

Lawngtlai West bialtu MLA leh MPCC Vice President Pu Ngunlianchunga chuan Mizoram State University(MSU) hi “Lungleiah din ni rawhse” tiin nimin piah lawk khan Congress Party chhung inkhawmah a sawi a, hemi hma hian Mizoramm state Lagislative Assembly Session-ah Dr K.Beichhua te nen an lo au tawh bawk a ni.
Chhim lam a MLA te hian he MSU din tur hi Siaha emaw, Lawngtlaiah emaw dah rawhse tiin an au lova, Chhim lam pumpui huap leh Mizoram pum huap thlir in Lunglei a dah an rawt a, an au chhuak a ni. Hetihlai hian Lunglei leh Hnahthial lam a kan MLA neih ve te chuan Lungleiah he Mi- zoram State University hi dah ni rawhse tiin an au lova, Aizawla dah an duh zawk a ni ngei ang.
MLA emaw MP emaw te hi mipuin kan aiawh a thil ti tur a kan thlanchhuah te an ni a, thil awmsa eg.MLA fund sem sawm tur ringawt  leh party worker te Contract therhlo sem  ringawt  tur a thlan chhuah an ni lova, Political Will an tih ang a, kan hamthatna tur leh hmasawn na tur hi kawng harsa leh bumboh pawh zawh a, hmala tur a thlan an ni zawk tih hi in hre teh se. MLA te hi smart taka Bureaucrats ang mai a awm tur leh inchei tur pawh an ni lova, incheina(Fashion)-ah te hian buai ve tur an ni lo.
Pu Ngunlianchunga te ang tal hian kan MLA te hian State University te hi vei sela,vei tur dik hi min vei pui se tih hi Lunglei leh chhim mipui hian an duh niin a lang a, debate emaw Talk show te hi tu ten emaw buatsaih ta sela, kan rulling MLA te hi an thu ngam angem tih pawh hi zawhna lian tak a ni ta.
Nalh tak leh smart taka inchei ai chuan Enge an bial mipui leh Dist. tan hmasawnna an thlen a, awm lo ata  enge harsa tak atanga an rawn sut kuak a, an sual chhuah tih te hi a pawimawh. Khuallianah te hian kan Minister leh MLA rual te hi   an tang tam ta lutuk ni te hian a lang a, nitin mai a khuallianah an tang tih thawm hriatreng tur awm te hi kan ram hian a that pui ber em, hetianga  hun an hmang  tam lutuk hian hna a thawh tir thei lo em, nge, tih tur an nei lo zawk tih pawh zawhna a awm chho mek tih hi hre hlawm teh se.