Ruah sur zawh veleh a ATL siam tha tur a tih SLT hmalakna a bei tham

Lunglei 2/9/2025: ATL Road siam anih laiin Haulawng to Dawn lamah Motor kal tir a ni ang tiin ZPM Southern Hqtrs Lunglei, ATL Road vil tur a an tih Pu T. Lalhlimpuia MLA chuan mipui hmaah a lo sawi tawh thin a, mahse vawiin thlengin Haulawng to Dawn Road hi Motor lian kal theih tur a cheibawl emaw buatsaih a ni hran lo.
Thudawnna in a sawi danin Haulawng to Dawn hi PMGSY Road niin kawng Blacktop chhah zawng hi 20 mm(Inches 1 pawh tling mang lo) a ni a, Motor lian ke 12 nei emaw Truck pangngai pawhin han zawh se lang awlsam taka chhe mai thei a ni a, chuvangin Pukpui leh Haulawng inkar siam hunah Diversion a atan hman anih chuan a chhe chak dawn hle a ni. Helai tlangdung a khaw thenkhat te hian kawngpui an nek nasa a, kawng area a tet phah a, Motor inpelhna tur pawh a zim a, chetsualna pawh a thleng awlsam thei dawn ni a thudawn a ni.
Tlawng leh Ramlaitui inkar(ATL Road43,58 km )hi tunhnai lawk khan PWD Road Div-II hnuaiah dah a niin PWD Sub. Division chu Haulawngah dah thar a ni a, mahse tun dinhmunah Haulawng PWD Sub Div. hi thuam chak a ni lova, kawng tha taka siam turin beiseina a lian lutuk lo. PWD Sub Div. Haulawng-ah hian SDO post chu JE in charge la a enkawl in SA 2 leh LDC 1 an awm a, Labour an nei lo. Kawng khuar leh kawng min(land slip) paih nan Rs Nuai 50 vel seng tawh in a ba in an paih a, Rs Nuai 20 vel chiah an la dawng a ni. JCB leh khawl dang neih an nei lova, mimal ta an hire mai thin a ni.
ATL Road siam tha tur a tih SLT Construction Pvt Ltd te hi fur zawh veleh hna tan tur a tih nimahse tun dinhmunah Mausen bula riahbuk an sual leh rawra herna khawl an bun bak an hnuhma hmuh tur a la awm lova, Lung chang hman tur an tlachham a , Dawn kawng lama quarry an beisei chu Forest Deptt lamin Clearance an pe thei lova, Kanghmun lamah ngaihven an tum a, mahse hmalakna engmah an nei chhunzawm rih lo nia thudawn a ni. Ruah sur zawh veleh a kawng siam tha tur in hmalakna tak tak an nei lova, CRRI in helai a leillung awmdan Lab.-a an test result chu zo tawh mahse a result hi hria leh hmu an la awm mang lo niin kan thudawnna chuan a sawi.