Editor Comptroller and Auditor General of India (CAG) report hnuhnung ber chuan Health & Family Welfare department enkawl chungchangah Mizoram sorkar chu na taka sawiselin hriselna lam atana pawisa dah tlem lutuk, hnathawk indaih lohna nasa leh Covid-19 hri len lai a mipui hriselna lam ngaihthahah a puh.
CAG report-in a tarlan danin chuan National Health Policy, 2017 chuan kum 2020 atang chuan hriselna lama sum sen tur ruahman hi budget pum atanga za zela 8 aia tama tihpun chhoh tur a ni a. Mahse, kum 2017-2022 inkara Mizoram a hriselna lam atana budget ruahmanchu 8 % aia hniam a ni a, 4 % point 8 leh 6 point 60 bial inkar chauh a ni . Kum 2021-22 ah budget pumpui atanga za zela 3 point 95 chauh hriselna lam atana hman tura sum ruahman a ni a, kum 2017-18 ah za zela 4 point 94 chauh ruahman a ni bawk. District hospital zingah Aizawl a district hospital-te tih loh chu mipui mamawh ang tur nei kim an awm lo. District Hospital-ah te hian specialist doctor indaih lohna chu za zela 39 leh 45 inkar a ni a, general duty doctor indaih lohna phei chu za zela 72 leh 75 inkar a ni a. Nurse indaih lohna hi za zela 43 leh 46 inkar niin paramedic indaih lohna chu za zela 45 leh 50 inkar a ni.
Covid-19 hri len lai khan hriselna lama hmasawnna ruangam dinte chu tangkai taka hman a awm meuh lova. Covid-19 hri kai leh kai loh endikna RT-PCR khawl bun a khaw tlai a, oxygen siamchhuahna khawl bun pawh tihkhawtlai a ni. Kum 2021 April thla chaw hnu lama bun fel tura tih oxygen siamchhuahna khawl 7 zinga 2 chauh kum 2023 April thla khan bun a la nih thu auditor-te chuan an hmu chhuak a. Thla 11 leh thla 25 inkar chhung zet tihkhawtlai a ni tihna a ni.(AIR)
POWERED BY ZUNZAM DAILY NEWSPAPER
