NCC Cadet 247 rual ten Silai kah an zir

Lunglei 11/9/2025: 2 Mizo Battalion NCC (National Cadet Corps) chuan September ni 8, 2025 atang khan 2nd Bn MAP Complex, Luangmual, Lungleiah NCC cadet-te tan ni 10 awh tur Combined Annual Training Camp (CATC-90) an buatsaih. CATC-90-ah hian Junior Division (JD), Junior Wing (JW), Senior Division (SD) leh Senior Wing (SW) cadet 247 an tel a. Camp Commandant, Colonel Sagar K. Mohanty chuan cadet-te fuihna thu sawiin camp hi a hawng a. A ni khat ni hian 20 Assam Rifles Commanding Officer, Colonel Jaswinder Singh Rana chuan cadet-te hmaah ‘Operation Sindoor’ chungchang leh sipai (Armed Force)-a luh dan kawng hrang hrang a sawi a. Lam zir leh silai (.22 rifle) leh map hman dan te zir a nih bakah, Lunglei District Superintendent of Police Pu J. Lalmuankima’n cadet-te a fuih.CATC-90 buatsaih chhung, ni sawm chhung hian NCC cadet-te chuan sipai lam, silai leh ralthuam hman dan, taksa insawi zawi leh inthunun, hruaitu tha ni tura thil pawimawh leh khua leh tuite mawhphurhna hrang hrang an zir dawn a. Mi thiam sawm bikte’n thupui hrang hrang hmangin cadet-te fuihna leh zirtirna hun an hmang thin ang.