Karleh Ni 22nd Sept atangin thil man a tlawm dawn

Vawiin khan Commissionerate of State Tax chuan Sept.Ni 22, 2025 atanga hman tur India ram puma GST rate tihdanglam leh a kaihhnawiha hriat turte inhriattirin Mizoram puma Taxation Officer-te tan Refresher Workshop on GST hun hman a ni a, vaihlo tih chauh loh thill man a tlawm nual dawn tih tarlan a ni.
Pu David Lalchhuanawma, Additional Commissioner of State Tax kaihruaihah hian Commissioner of State Tax Pu H.K. Lalhawngliana chuan GST rate hlawm li lai awm thin chu September Ni 22, 2025 atang chuan hlawm lian hnih (two slabs)-ah kalpui a ni tawh ang a, bungrua leh tha(service) hralhnaa GST rate chu 5% leh 18% a ni tlangpui tawh ang. Vaihlo leh a kaihhnawih thil ah 28% GST lak a ni ang a, Lirthei thenkhatah 40% a ni tawh ang, a ti. GST rate tihdanglam tur hi a tlangpuiin a hniam zawnga a kal dawn avangin thil man hniam phah tur tam tak a awm dawn a ni a ti.
Sorkarin GST rate a tihhniam hian a tum lian tak pakhat chu mipui nawlpui banphak leh man tlawm zawka lei theih tura thil man siam that a ni a. GST hniamna tur bungrua leh tha zawrhna lama sumdawngte chuan a zawrhna man an tihniam ngei tur a ni a, hemi kawngah hian Sorkar chu a thikthu a chhe hle dawn a ni. September Ni 22 hnu lamah chuan GST rate tih hniamna bungrua leh tha (service) zuar te zingah a man ti hniam lo report lut a awm chuan Anti Profiteering Measure hmanga action lak zel tur a ni ang” a ti. Sumdawngte chuan an tih ngei ngei tur – anmahni dawrtute hnenah Tax Invoice an pe chhuak tur a ni a ti.