Sunday-ah tuisem dawn tawh lo

Lunglei 25th.Sept.2025: Er.V.Laldanmawia E.E, PHE, LWSM Division chuan Pathianni ah tui sem tawh loh an tum tih a sawi.
He thu hi Lunglei Dist Consumer Assn leh MJA te hmaah sawiin Er.Mawitea chuan Pathianni a an nau ten tui an sem thin chu an an khawngaih ve thin tih sawiin tuisem zingah Kohhrana nihna pawimawh tak tak nei te pawh an awm a, inkhawm duh leh Kohhran Programme a tel ve duhte pawh an tel theilo thin a, Pathinni a tui sem tha ti lo an awm ve nual bawk si avangin September ni 28.2025 Pathianni lo awm tur atang chuan tiam chin awm lovin Pathianniah tui sem an tum tawh lo tih a sawi.
Pathianni a tui sem tihtawp chungchang hi Office lama thawktute leh Section 15 a J.E te nen ngun taka an inrawn hnuah thu tlukna siam an nih thu a sawi a, Kohhran hun pawimawh bikah erawh an mamawh chuan tui hi pek theih a ni ang a ti. Pathianni a tui sem an tih tawp rih dawn avang hian eng angin nge nghawng a neih dawn tih erawh hriat lawk mai theih a nilo tih sawi bawkin thal tui harsat hunah erawh Pathianni a tui sem loh hi a kalpui theih reng dawn em tih erawh sawi lawk theih a nilo a ti.
PHE, EE hian Lunglei tui tlan ber Tlawng leh Pialthleng tui pump-na lama luanglut thei tura veng thenkhatin bawlhhlawh an la paih thin chu thalo a tih thu sawiin, tlawng lama luanglut lo turin kawra bawlhhlawh paih chu sim a tul hle a ni a ti bawk.