Editor Lunglei 30/8/2025: Ministry of Development of North Eastern Region (DoNER)-a Joint Secretary (NEC) Pu Angshuman Dey chuan vawiin khan Lungsen khuaa oil palm chinna hmun tlawhin, oil palm chingtute harsatna leh mamawh hrang hrang a enpui.
DoNER Joint Secretary (NEC) hi Lungsen BDO Pu Lalhruailiana Zote hovin Horticulture Department-a thawktute leh kut hna thawktute’n an lo dawngsawng a ni. Pu Angshuman Dey hian oil palm chingtute dinhmun leh mamawh hrang hrang enpuiin, department hotute nen hlawk zawka oil palm thar chhuah a nih theih nana thil pawimawh hrang hrang leh hma lak dan turte an sawi ho va. Oil palm hralh chhuahna kawnga harsatna lian ber pakhat, a phurhna kawng (link road) mamawhna te a hmunah hmuhpuiin, an harsatna sut kianna tur project ngaihtuah a nih tur thu a sawi. Lunglei District chu oil palm chhinna tur ram nei tha district a nih angin awmze nei zawk leh tihtak zeta oil palm chin chu kalpui turin kut hna thawktute a chah a. An mamawh hrang hrangah inthlahrung lova department-a thawktute rawn thin tura chahin, kut hna thawktute’n an harsatna leh mamawh hrang hrang a hnena an thlente chu a theih anga um zui a nih tur thu a sawi.
Agriculture & Farmers Welfare Department Secretary Pi Ramdinliani, Joint Director Pu B. Ramnunsanga, Deputy Director (Oil Palm) Pu David Fangzauva leh Assistant DAO Lunglei Pu K. Lalrinfela te’n an tawiawm a ni.
POWERED BY ZUNZAM DAILY NEWSPAPER
