MZI kum 45-na Silver Mount-ah an lawm

Lunglei 30/8/2025: Mizo Zaimi Inzawmkhawm(MZI ) Lunglei chuan vawiin khan Silver Mount Hotel Lungleiah an kum 45 tlin na an lawm a, intihhlimna te neiin zanriah an kil ho.
Pu Lalzuithanga Khiangte, Chairman LMC leh tunhma a MZI Secretary leh President lo ni tawh thin chu khuallianah an hmang a, Pu Zuia chuan MZI tana hma an lo lak tawhna hrang hrang sawiin Zaimi te chawikan a tih hmasawna leh an zahawmna vawnghim tur in theihpatawp a hma an lo lak tawh thin dan a sawi.
Lar tawh vanga zai mite chu pawl anga thunun har tak an nih thin dan te sawiin mahni awmna pawl dan leh hrai te zawm a, chumi anga kal chu mahni tan theuh pawh a thaber a ni a ti.Tunhma in MZI chu Lunglei Dist-ah Dist. huap a Committee hrang hrangah te pawh telh ve thin an nih thusawiin chu dinhmun chu luah thar leh turin tun a hruaitu leh member te pawhin tanla se a ti a, hetihrual hian LMC-a a awm ve chhung chuan LMC ang pawhin zai mite leh MZI chu ngaih pawimawh an ni ang a ti. Pu Lalzuithanga Khiangte hi , MZI Lungleiah Patron niin amah pawh hi zai ngaina tak a ni a, MZI Lunglei dintu te zing a mi pawimawh tak a ni.
He hunah hian Pu ZH Ropuia Ex Minister leh MZI Vice President Lunglei bakah Pu H.Lalthansanga, President MJA leh MDM aiawh te pawhin thu an sawi a ni. MJA hian MZI kum 45 tlin lawmnan thuziak cheimawi an hlan a ni.
Kum 45 tlin an lawmna inkahwm hi Pu Roberta’n kaihruaiin Pu K. Lalrinpuia’n Pathian hnenah hun a hlan a, Lawmkima Colney leh Esther Hnamte te leh midang ten zaiin hun an hmang a, zanriah eikhamah zaiin hun hlimawm tak an hmang zui a ni.