Editor REGIONAL FEELINGS VRS REGIONAL BIAS
Prof. J Zorema
British hovin min rawn awp khan Lushai Hills (Mizoram) chu hmun hnihah an then a. South Lushai Hills chu Lunglei headquarters a hmangin Superintendent in a awp a, Bengal sorkar hnuaiah dah a ni a. North Lushai Hills chu Aizawl headquarters a hmangin Political Officer in a awp a, Assam sorkar hnuaiah dah a ni a.Tichuan North leh South Lushai Hills chu dinhmun in angin an lo awm thin a ni.
Hun alo kal leh deuh a, remchan zawkna avangin British sorkar chuan 1st April 1898 atangin North and South Lushai hills te chu kaikawpin Aizawl chu headquarters ah siamin Assam sorkar hnuaiah a dah ta a. Heta tang hian Lunglei chuan tha chhangdawltu (subordinate) dinhmun a lo luah ta a ni.
Aizawl city hi kan state khawpui ber anih angin a thang tur a ni a,a ropui tur a ni a, a mawi tur ani. Amaherawh chu hun kal tawh leh kan hun tawn mekte thlir hian mahni inhmangaihna, mahni inhai vur duhna leh midang hrek beh duhna, mite chanvo chhuhsak duhna hial a lo awm thin hi a pawi tak zet a ni. Hei hian mi te thinlungah beidawnna leh in lak hran duhna hial tepawh a lo thlen tawhin hriamhrei (arms) nena helna hial tepawh alo hring chhuak tawh a ni. A nihna dik takah chuan MNF Movement lo chhuahna chhan ber pakhat pawh Tampui Mitthi (Mautam) kan tawrh laiin India sorkarin min ngaihsak tawk lo tih vang a ni. Ngaihsak loh va inhriatna hian Regional Feelings a hring chhuak a, chu chuan in pumkhat lohna (Seccessionism) inlak hran duhna thinlung a keu thei a ni.
Aizawl hi Mizoram emaw ti a, thil tha zawng zawng dah tumna hi Regional Bias a ni. Hmasawnna kai rual lo lutuk a vang a kan ram a thil thleng tlem lo tarlang ila.
Kum 1949 October thla a Pawi-Lakher Tribal Union lo din chhan chu, Lusei ho chu lehkhathiam hmasa leh changkang hmasa an ni a, an ni (Pawi & Lakher) changkan vena tur leh hmasawnna daltu a an ngaih bakah Lusei ho hian hmusit hle a an inhriat vang a ni. An Pawl thiltum bulpui ber chu Lusei ho nena inzawmna zawng zawng chhut chah a mahni a rorelna hran neih a ni. He pawh hi Pawi-Lakher Regional Council lo pian chhuahnan a bul tumtu a ni. Hei bakah hian khawthlang lamah Tuikuk hovin in kahchhuah tumin BNLF movement an kal pui a, chutiangin hmar lamah Hmar hovin HPC Movement an kal pui bawk anih kha. Heng zawng zawng lo chhuahna chhan chu hmasawnna kai rual lo leh hlamchhiah ni a inhriatna a vang a ni.
Lunglei khawpui, a tira Aizawl nen a khawpui ber nihna chang ve ve, a hnu a thachhang dawltu dinhmun a lo ding ta pawh hian a chanvo ni ngei a lang engnge maw zat a lo chan tawh a. A hmasawnna vena tur tepawh hmundanga sawn tepawh alo ni tawh ani. Tlem i han thailang teh angโฆ.
- Prime Minister Rajiv Gandhi’an pek min tiam Vety College chu Aizawlah thiam taka sawn a ni a. Vety School kan lo nei ta zawk a ni.
- Tribal Residential School (Tweril tuna Eklavya School) pawh hi kan mi thil hria ten central atanga an dil chhuah a ni a. Cheng nuai za tur a ni a, First Instalment cheng nuai 50 central sorkarin a rawn sanction chu Aizawl atan min chhuhsak ta a. Vantlang kawng zawh te huaihawt a nih hnuah harsa taka nawr chhuah a ni.
- MZU Southern Campus kan dil a, kan nawr a. A tawpah mahni in tungnung chawpa (Self Finance) kalpui tura tih kan ni a. Changkang lo zawk, dinhmun harsa zawk, ei leh bara harsa zawk tan chuan tlin rual a ni si lova.
- RUSA hnuaiah Engineering College sak a ni a. Prime Minister pawhin online in a hawng tawh anih kha. Tun thlengin a la function thei lo va, sorkarna chelhtu apiangin electricity, approach road, tui etc a harsat zia thu min sawi khum aโฆhui ha, Aizawl chu ni se kan ti kan ti mai zawng anih hi.
- NEP hnuaiah State University din tur a ni a, Lungleia min din sak ngei turin kan dil a. Mahse Aizawl a dah tumna a awm thu leh hma chak taka lak mek anih thu hian min thawng hle a ni.
Tih tak emah chuan zirna in pawimawh zawng zawng Aizawlah a in ek beng tawh a, khawpui a tawt em em a, motor tepawh in tlan chhawk hial a ngai tawh a. Chumi ti tawt leh zual tura hmalakna hi thil tha ni theiin a lang lo. Thiamna sang hi chhim thalaite hian an kawtkai atangin zir ve tawh se kan ti tak zet a ni.
State University din tura Criteria tih te hi chu thuneitu thu thu ani. Meghalaya pawhin an State University chu Shillongah ni lovin Tura ah zirlai 200 chuang hret nen an tan mai ani.
Kan chanvo ni ve a kan hriat chang ve tura kan hmalak thinna te, kan vuivaina kan tih lan ve zeuh zeuh thin tepawh “thliarkar rilru” min han tih sak thin hi chuan rilru a tina thin khawp mai. A nih leh chutiang alo nih si chuan he zawhna hi han chhang teh u leโฆ” TUNGE THLIARKAR SIAMTU CHU”.
