Press Club a dah tur Water Purifier a pe

Lunglei 19/9/25: Pu Joseph R.Lalremngheta,Vice President LDCC chuan vawiin khan Lunglei Press Club a dah atan tui in tur tih thianghlimna Kinsco Water Purifier a hlan. Thilpek hlanna hun hi Press Club, Committee room ah Pu H.Lalthansanga President kaihhruai a neih a ni.
Pu Joseph R.Lalremngheta chuan MZP hruaitu hlui a lo nih tawhna atangin Lungei tan theihtawp an lo chhuah ve thin thu sawiin tunah hian Lunglei hian chhan kan ngai a, tunhnaiah State University leh kalkawng chungchangah pawh mamawh kan nei a, lungrual tak a chet ho a ngai a ni a ti. Hmasawnna hna thawh chungchangah Company/contractor kut a ni emaw, Sorkar kut pawh nise vantlangin kan enpui ve zel a tul a, Company/contractor kut a lawm ti ngawt lova an hnathawh ngaihven a ngai, a ti. Company hi chu reiloteah an kal leh mai dawn a, neitu nihna an pu lo tih hriat a tha a ti. A thilpek themlem tak MJA ten an dawngsawng duh chu lawmthu sawiin “MJA te Lunglei tan in thawh tawh naah lawmthu ka sawi a, theihtawp chhuah zel turin ka sawm a che u”, a ti.
Pu H.Lalthansanga President MJA pawhin thilpek an dawng chu lawmthusawiin Press club hi Lunglei mipui ta a ni a, MJA in kan enkawl mai a ni tih sawiin pawl hrang hrang pawhin thu puanzar tur an neih nan zalen tak a hmang turin a chah nghal.