DAO hovin Loneitu te an kalchilh

Lunglei.19th.Sept.2025: Vawiin khan Tawipui North- I ram Bawktlang hmunah Vansang leh Ngengrual Zaua lo neitute pualin Farmers Field Day Programme hman a ni. Hemi puala inkhawm tawi Bawktlang rama neih hi Pi Lalzuimawii Vice President Tawipui North – I, V.C in a kaihruai a, an khawtlangin Vansang leh Ngengrual Zauva Buh leh Hmarcha thahnem tak an chin dan leh thar tam an beisei thu sawiin, he hun hmanpuitu DAO Lunglei a thawktute chungah lawmthu a sawi.
Hun hmanpuitu Lunglei Dist Agriculture Officer, Pu VL.Hmangaihchhunga chuan thu sawiin, Farmers te leh khawtlang hruaitute in lungrual hi a pawimawh hle a ni tiin Tawipui North – I chu khawtlang hruaitute leh Lo neitute thawhho thatna ber pawl nia a hriat thu sawiin, thawhhona tha an neih avanga an hnathawh rah chhuah hmuhnawm tak chu lo awm thei a ni a ti a, an hmarcha thar chhuah hmanga mahni kawtkaia sum tam tak an lalut thei turte chu lawmawm a tih thu a sawi.
DAO chuan tunah hian kut hnathawh hi awmzia a awm tan tawh tih a takin kan hmu chho zel a, hmun hla tak tak a tharchhuah te phurh kual ngailo in mahni kawtkaiah kan hralh thei tawh a ni a ti. Hetihlai hian thil hi tam kan ti hma lutuk a, tam kan tih hi a tam thin loh avangin tharchhuah tam deuh deuh kan tum tur a ni tiin khawtlang lungrual te hi Sawrkar-in a ngaipawimawh thin a, Tawipui North – I khua a Farmers te pawhin harsatna an neih chuan Department-ah sawi hreh lo tur leh a theih ang anga tanpui an inhuam thu a sawi.
Vansang leh Ngengrual Zauah hian Chhungkaw 30 in thlawhhma lain Buh leh Hmarcha bakah thlai dangte an ching a, Farmers Field Day an hman naah hian Lo neitu thahnem tak bakah Dist Agriculture Office Lungleia thawktute leh Media lam te telin Lo an zo nghal a, Tawipui North – I VCP Pu Lalbiakngheta bakah Dr.Vanlalchhandama ten thu an sawi bawk.