Editor Lunglei 20/9/2025: Pu Vanlalzawma Vice President. MNF General Headquarters chuan “MNF hi ral mai mai tur party a ni lo. Party dang neih ve loh ni pawimawh parukte ringawt avang pawhin Mizoram leh Mizo Hnam a din chhung chuan MNF hi vung takin a kal zel dawn, a ti.
He thu hi vawiin a MNF Office Lungleia Martar te ni an hman naah sawiin Pu Zawma chuan kan hnam pasaltha, ram tan a nunna hlantute avangin Mizote hi India do ngam, Vai kap ngam ti a, hriat kan ni a ti. Kan sipaite khan rammut la duh hle mahse, Arona hova Sebawng nen kan inthawi kha an hlau a. mipui zawk kha vai culture ah kan in tah luh kha an hlau hle tih sawiin hnam pasaltha te khan an silai tung mahse, hnam thuthlung an tung tel lo tih sawiin kan hnam pasaltha, martar te khan kan ram, kan hnam, kristian sakhua humhim a nih zel theih nan theih tawp an chhuah a. ZPM te ang a, kah khat chiah a puak dur tur nilo vin MNF hi Mizo leh Mizoram a awm chhung atan an thihchilh a. Anni zarah vawiinah zalenin, khawvel hriat tham kan lo nih phah a. Kan hnam tan a martar te kha theihnghilh ni an awm lovang” a ti.
Pu Zawma chuan, “MNF hi Pathian leh kan ram tan theih tawp chhuahin kan inbuatsaih a, kum 2023 MLA inthlan khan MNF candidate 22 te khan, kum 2018 inthlan ai khan vote kha an hmu tam zawk vek a. Congress ral mek zel avangin kah khat a puak dur ZPM te an lo awm avangin hnehna kan chang zo ta lo. Tunah chuan, kan lo kal dik tawk lohnaah in siam tha zelin, ram leh hnam tan, MNF te kan lo let leh mek a. MNF te hian ther hlo leh engemaw beisei hmuh loh vanga MNF ka chhuahsan e, ti ve ngawt tur kan ni lo. MNF sawrkar leh hunah Lunglei leh Chhimlam hi a pawimawh chho tulh tulh dawn a. Nakinah chuan Zochachhuah thleng hian Rel a la lut dawn. Silchar pa, Aizawl pa hian Lunglei, Lawngtlai a total bandh neih hi an la hlau hliah hliah dawn. Chhimlam hi Mizoram kawtchhuah a ni thuai dawn, a ti.
MNF Sub Hqrs Lunglei President Pu Vanlalhmuaka pawhin Martar te, hnam sipaite nunna leh thisenin a ngen chhuah Article 371(G) hi thenkhatin sawinep, sawi dal tum thin mahse, kan ram, kan hnam inhumhim nan a hman tlak a. A hmang tak tak ngam, MNF ten rorelna fawng kan vawn leh thuai a pawimawh a. Chumi tur chuan, Lunglei atangin bul kan tan chho leh mek a. Pathianin malsawmna in min vur leh dawn. Tun a nung dam a la awm, hnam sipaite hi nung martar kan ni a. Anni hlutna hi kan chhiar nawn fo a pawimawh. Pathian leh kan ram tan a nunna hlantu pasalthate kha zahin i chawimawi zel ang u, a ti.
Martarte ni hmanna inkhawm hi Pu Chawngthanmawia Vice President MNF Sub Hqrs Lungleiin kaihruaiin Pu. H.Lalremruata Treasurer MNF Sub Hqrs Lunglei chuan lawmthusawi in hun a khar a ni.
