Lubnglei SP in thil chi 3 mipui te mamawh a sawi

Lunglei 16/10/25: Pu J. Lalmuankima, SP Lunglei chuan pawikhawihna leh thil diklo tihna a thlenin kha hmun kha Forensic hmanga chhuifiah theih tur a lo humhim a ngai a, bungrua lo senghawi emaw, hnuhma tireh ang zawng a kan chet loh a ngai a ni a ti.
He thu hi vawiin a thuthar lakhawm tu te nen a Office a an in kawm naah sawiin Lunglei SP chuan misual leh pawikhawihtu te hnuhma hi Forensic hmanga finfiah zel turin Lunglei Police Station-ah pawh Forensic expert mi 7, Forensic Van(Motor) an nei tih a sawi a, mahse hmun engemawzatah tualthahna emaw, inrawk leh thil dang hnuchhui harsa khawp a hnuhma lo senghawi te a awm thin a, hei hian duh ang takin hnuchhui a ti harsa thin a ni a ti.“ Hetihrual hian kumtling lo leh Licence neilo te Lirthei khalh tir lo tur in nu leh pa te a ngen a, kumtling lo in lirthei a khalh avanga pawikhawihna leh chetsualna a thlenin naupang/kumtling lo kha hrem theih ni lo mahse an nu leh pa te zawk khan an tuar thei a ni a ti. Heimai ni lovin an thiamna zawkah pawh chetsualna a thlen in Insurance claim theih a ni lo tih hriat nawn a ngai tih a sawi.Heibakah mahni lirthei windshield-ah phone number tar theuh tur in lirthei neitu te a ngen a, hei hi a tul angin bawhzui a ni ang a ti.
Traffic Police indaihlohna phuhru turin Private Security, JKH Security Lunglei ah a awm dawn ta tih sawiin inneih, lungphun, Kohhran Inkhawmpui leh eng emaw mipui punkhawmna a awm changin Traffic Police te dil an ni thin a, hei hian Traffic Police duty indaihlohna nemenlo a siam thin. JKH Security te hi Traffic Police hotu ten Theory leh Practical in Training an pe ang a, hemi hnuah chuan Traffic Police(Regular) kaihhruaina hnuaiah an duty ve tawh ang a, an hlawh tur chu an va duty na hmun a mimal emaw pawl khan an tum mai tawh dawn a ni a ti.
Lunglei Police te hian CCTV Camera tha tak hmangin Serkawn leh AOC Square inkar hi an vil reng a, zanah pawh thlalak fiah tha tak niin a aia changkang leh tha nei turin tunah hian ruahmanna an siam mek. SP hian mi awmthei leh khawsak pangngai chin chuan CCTV hi vuah tum theuh tur a sawmin abikin Dawr kai te phei chuan vuah se a duh tih a sawi a, hei hian pawikhawihna awm thei tur a ven rualin hnuchhui kawngah awlsamna nasatak a thlen thei a ni a ti. Hetihrual hian CCTV vuah naaah chuan mimal zalenna humhim a ni tih lantir nan CCTV in a vil reng tih hriat na tar a ngai a ni tih a sawi bawk.Lunglei Police te hian January to October vawiin ni 16 thlengin rukruk thubuai 23 ziaklutin inrawk(burglary) 66 an ziak lut a ni