Editor Lunglei 14.8.25: LMC Board of Councillors (BoC) chuan kumin 2025-a Krismas Bazar siam turah hma la turinTask Force Committee an din. Kum 2023–2024 Urban Local Body Grant 2nd Installment dawn fel a ni tawh a, Ward tinah rualkhai taka hma lak ni se an ti.
LMC-in mipuite chhawk zangkhai nan Urban Transport hnuaia khawpui chhunga bus service-tir tura BoC hmasain a lo rel tawh bawhzui dan tur an ruahman bawk. GIA hmanga hma lak dan ngaihtuahpui turin sawrkarah dilna thlen ni se, Budget-ah telh tura chhawp chhuah ni se, tih a ni a. Bawhzui turin Executive Councillor Pu Zorinsanga Hmar chu ruat a ni. BoC-in a lo pawm tawh, The Mizoram Urban Area Building Regulation 2024 chu Lunglei khawpui chhunga mipuite zawh tawka kalpui a nih theih dan tur lo duang tura ruat, CEO Pu Donny Lalruatsanga’n ruahmanna sawi hovin siam rem ngai laite CEO-in lo siam tha se an ti. Garbage Free City Project kalpui mekah ward pali – Ward number 1, 2, 9 leh 11-ah te hma lak mek a ni a. He’ng hma lakna atan hian BoC chuan ULB Grant Tied Fund, Sanitation and Solid Waste Component atangin cheng nuai 40 an pawm. LMC Ward 4-na Councillor Pu R. Lalramzauva Resolution, ZMC&H pantute tana khualbuk sak chungchang pawh sawi ho a ni a. Dan lam atanga thlirin, LMC-in a tih theih thil a nih leh nih loh te zir chian a, sawrkar lamah thlen nise an ti. LMC Board of Councillors thut khawmah hian elected councillor 11 tel kimin, LMC CEO Pu Donny Lalruat sanga’n a telpui .
