Permit nei lova mihring phurh

Motor Vehicle Act Section 41(4), 1988 (59 of 1988) hian Transport leh Non-Transport vehicle hi mumal tak in a duang a, Public Career, Rental car ni turin Licence a ngai a, Mahse, Rental car pawh ni lo, Public Career pawh ni lo, Private Car/Vehicle anga registered si , School Bus/Taxi anga tlan hi Lungleiah pawh an awm nual niin a lang. Heng dan bawhchhia hi Sorkar hian engtinmah a ti lova, Motor neitu te lahin dan bawhchhia an ni tih pawh an in hre lo amaw tih mai tur a ni.
Vanduaithlak takin heng Motor hi lo accident ta se emaw, engemaw chhiatna thleng ta se, Insurance Company-ah van duaina tawk te hian zangna dawmna ngiat(claim) dawn ta se, harsatna tawk lo tur a inngai hian an tawk ngeiin a rinawm.
Thuneitu te hian an duhdan leh awm an tih chenah chiah hian Dan awmsa hi an lekkhawh thin a, tlemlai deuh atang khan Dan awmsa tho chu hmangin Two Wheeler kan tih Scooty leh Bike khalhtu te chu Helmet ISI chuang ngei khum turin Lunglei SP chuan thupek a chhuah a, lirthei khalhtu te chuan an zawm tha hle a ni. Two wheller nei leh khalhtu zawng zawng hian an neih chuangliam a an lirthei hi lei an ni vek kher lova, satel helmet khum a vawitekhatmah accident la tawk lo pawh an awm mai thei. Thupek anih avang leh an himna tur anih miau vangin Rs 1000 chuang ten Helmet an lei a, thuneitu ten tih tur an tih chu an zawm mai a ni.
Hetihlai hian Lirthei manto zawk Rs Nuai 6/7 vel a lei thei ten dan lova School naupang kal leh haw lam man chawi a an phur kual a, Police Thanna leh SP Office an tlanpel zuai zuai chung pawhin pip e pup e tih a ni ngai lo. School naupang hruai nan chuan Educational Institution buse emaw neih a ngai a, Taxi service mek te lahin an en liam ve mek bawk.
Hetiang thil hi SP emaw a khap thei tu hian Dan bawhchhiat naah an ngai lo zawk nge? Chetsualna a awm hun hunah dan awmsa hi chelek tur tih hi zawhna a ni.Dan ang takin Sikul naupang hi phur se, kan zavai tan a tha awm e.