Editor Lunglei 14/8/25: Vawiin khan Lunglei High Powered Committee (HPC) Vice Chairman Pu V. Malsawmtluanga chuan HPC Conference Hall-ah tun hnaia National Arm Wrestling Championship-a medalist leh World Police Meet-a medalist – Lunglei tlangval pathum leh nula pakhat hnenah lawmpuina thuziak a hlan.
Pu V. Malsawmtluanga chuan Lunglei tlangval pathum leh nula pakhat, India ram huap leh khawvel huapa medal late chu a chhuan thu sawiin, anmahni tan chauh hlawhtlinna chang ni lovin, Lunglei tan, Mizoram leh India tan an champion a ni, a ti a. Arm wrestler (inkut elh chak) an chawimawite chu tum ruh leh ti hram hram ṭhin, taima taka an beih avanga chuti ang dinhmun chu thleng thei an ni tih a hriatpui thu leh ropui a tih thu sawiin, an hma hunah a aia sang zawk thleng turin duhsakna a hlan a ni.
Lawmpuina inhlanna hunah hian arm wrestling medalist-te bakah, HPC staff-te leh Lunglei District Arm Wrestling Association hruaitu mi pali an tel a. Lunglei District Arm Wrestling Association President Pu K. Lalrinpuia pawhin thu sawiin, HPC Vice Chairman-in Lungleia arm wrestler-te a chawimawi chu hlu an tih thu leh, Lunglei ṭhalaite tana sports lama pa chan chang leh mi inphal an nei chu lawmawm an tih thu a sawi a. Chawimawite ai awhin C. Lalnunpuia’n thu a sawi bawk.
HPC Vice Chairman-in chawimawina a pekte chu he’ngte hi an ni.
(1) C. Lalnunpuia (Venglai) – Gold Medalist, World Police Meet (UK)
(2) Reuben Lalhmangaihzuala (College Veng) – Asia leh National Gold Medalist
(3) Lalbiakfela (Rahsiveng) – National Gold Medalist
(4) Emily C. Rohluzuali (Venglai) – National Silver Medalist
Chawimawi zinga mi Reuben Lalhmangaihzuala hi September ni 10, 2025-a Bulgaria-a World Arm Wrestling Championship-a India ram ai awha khel tur a ni.
