Editor PWD EE pension Pu C.Laldintluanga, LDCC Executive Committee Member ni bawk chuan Minister nih vanga thil hre ber anga an awm tlat leh an mahni aia hre zawk Department mithiam te hman tangkai tum miah lo te vangin hmasawnna a kal diklo thin a, sawrkar tak avanga Official te hmuh hniam nghal ringawt te hi a zahthlak a ni a ti.
He thu hi vawiin khan Congress Bhawan Lungleiah sawiin Pu C.Laldintluanga chuan Mizorama hmasawnna kairuallo em em chuan a rilru a tihnat thu sawiin sawrkarin chhim lam min enkawl danah hian mipuite rilru a na ngawih ngawih a, Aizawlah engkim awm tir vek an tum chuan engtin nge kan awm ve ang, Congress Sawrkar laiin Siaha leh Lawngtlai lamin Minister an neih ziah bakah Lunglei phei chuan Minister pahnih leh HPC Vice Chairman a nei thin a, chu chuan hma sawnna a kairual tir a ni a ti. Tun Sorkarah chuan chhim lamin Health Minister kan nei ve tawk a, ani lah hi ZMC&H hian a hip zo ta emaw tih turin damdawiin dang a kawrawk tial tial a, mang a ang tawh a ni a ti a, NEP 2020 in State University nei vek tur a thuchhuah a siam pawh Mizoram Sorkar chuan Aizawlah bawk dah an tum leh a, Chhim lam mipui tan State University hi Lungleiah hian dah ve hi kan mamawh a ni a ti. Ram mipuite chu sawi loh, chhim mipuite hian Congress Sorkar an ngai em em tawh a ni tiin, he ram leh hnam hi Congress Party enkawl tura Pathianin a dah hun a la awm anga chumi hunah chuan mahni insawi mawi mai mai emaw mipuite tih der mai mai emaw kan chin ve chuan a pawi khawp ang , ram kan enkawlna tura tha tura kan ngaihte mipuite hnenah kan inzuar anga, kan inzuar ang chu kan pe tur a ni a ti.
Politics hi in tihder leh dawt sawina hmun nilo in ram rawngbawlna tura Pathianin min dahna a ni a, mahni inphata pen chhuah hi Politics in a tum a ni a ti a, Duhsak bik awm lohna thliar bik awm lo Sawrkar kan siam hma loh chuan kan ram hian hmasawnna tak tak a hmu dawn lo a, tuna kan sawrkar hian ‘Kuthna thawktute kan duhsak ang’ an ti a mahse mi tam tak rilru an ti beidawng a ni a ti. POWERED BY ZUNZAM DAILY NEWSPAPER
